ԱՄՆ-ում բողոքի ցույցերն աճում են Մինեապոլիսում ներգաղթի և մաքսային ծառայության (ICE) իրականացրած գործողության ժամանակ կրակոցների հետևանքով ևս մեկ ամերիկացու մահից հետո:
ԱՄՆ իշխանությունները պնդում են, որ կրակոցներն ինքնապաշտպանություն են եղել, սակայն հրապարակված տեսանյութը կասկածի տակ է դնում այդ վարկածը:
Միևնույն ժամանակ, Կոնգրեսի դեմոկրատները մտադիր են մեծացնել ճնշումը Սպիտակ տան վրա՝ արգելափակելով ICE-ի համար նախատեսված բյուջետային միջոցները: Իրենց հերթին, հանրապետականները մեղադրել են դեմոկրատներին՝ լարվածություն հրահրելու համար:
Դեմոկրատական կուսակցությունը մտադիր է արգելափակել ICE-ի ֆինանսավորման օրինագիծը՝ որպես ներքին անվտանգության նախարարությանը հատկացումների փաթեթի մաս: Եթե Կոնգրեսում համաձայնություն ձեռք չբերվի, ԱՄՆ-ն կարող է նոր մասնակի շաթդաունի բախվել արդեն ուրբաթ, երբ լրանում է ժամանակավոր բյուջեի գործողության ժամկետը:
Բյուջետային փաթեթն ընդունելու համար Սենատում 53 ձայն ունեցող հանրապետականներին անհրաժեշտ է առնվազն 60 ձայն, ինչը նրանց կախվածության մեջ է դնում դեմոկրատների աջակցությունից: