Որևէ մեկը, այդ թվում՝ նաև Դաշնակցությունը, չի կարող միայնակ հաջողել Հայաստանում իշխանափոխություն իրականացնել։ Այս մասին լրագրողների հետ զրույցում այսօր հայտարարեց ԱԺ «Հայաստան» խմբակցության պատգամավոր Արմեն Ռուստամյանը։
«Մենք պետք է այս ընտրությունները դիտարկենք հենց այդ տրամաբանության մեջ։ Այս ընտրությունները պետք է վերածվեն իշխանափոխության գործընթացի։ Այլ միջոց անիմաստ է։
Դրա համար երկու պայման է պետք, որ ցանկացած ուժ կարողանա բավարարել. ոչ միայն հաղթահարել շեմը, որովհետև եթե չհաղթահարի, նշանակում է՝ փոշիացում, Փաշինյանի օգտին մասնակցություն։ Բայց եթե անհրաժեշտ շեմն անցնում է, բայց ընդդիմությունը չի հաղթում, առաջանում է այն իրավիճակը, որն այսօր ունենք»,-ասաց Ռուստամյանը՝ նշելով, որ ընդդիմությունը, չնայած ԱԺ-ում ներկայացված լինելուն, որոշակիորեն կաշկանդված է իր գործողություններում, ունի այն ներկայացվածությունը, որը չի ազդելու երկրի ներքին գործընթացների վրա:
«Սա դառը փորձից ենք ասում։ Ուրեմն, եթե ուզում ենք հաջողել, պետք է ընդդիմադիր խոշոր ճակատ ձևավորվի։ Պետք է քարոզչությունը տարվի այնպես, որ եթե կոնկրետ ինձ ձայն չեք տալիս, կարող եք տալ այս ճակատից որևէ մեկին, և ժողովրդին մեղել՝ գնալու ընտրության և ընտրություն կատարել ընդդիմության մեջ»,- նշեց ընդդիմադիր պատգամավորը։
Նրա խոսքով՝ ընդդիմության խնդիրը պասիվ զանգվածին ակտիվացնելն է։ Իշխանություններից դժգոհությունը, Ռուստամյանի համոզմամբ, մեծ է, և պետք է դժգոհ ընտրազանգվածը ընտրության հնարավորություն ունենա։
Ի պատասխան խնդրանքին՝ նշել մի քանի կուսակցություն, որոնք կարող են կազմել այդ ճակատը, նա նշեց՝ հենց ՀՅԴ-ն, «Ուժեղ Հայաստան» կուսակցությունը։ Բանակցություններ են ընթանում բազմաթիվ ուժերի, այդ թվում՝ ՀՀԿ-ի հետ։
«Ով մեր դեմ չէ, նա մեզ հետ է»,- նշեց Ռուստամյանը՝ կոչ անելով մի կողմ դնել անձնական հավակնությունները և հետամուտ լինել ընդհանուր շահերին։