«Հայաստանի հետ սահմանին գտնվող «Ալիջան» անցակետում աշխատանքները 90 տոկոսով ավարտված են», – այսօր տեղեկացրել է Թուրքիայի պետական Anadolu լրատվական գործակալությունը։
«Անցակետում կառուցվել են սահմանապահ և մաքսային գործառույթների համար նախատեսված շինություններ, տեղադրվել են գովազդային պաստառներ, որոնք պետք է խրախուսեն Հայաստանից Թուրքիա ժամանողներին այցելել Իգդիր ու հարակից շրջանները», – տեղեկացնում է թուրքական լրատվամիջոցը։
Anadolu-ի տեղեկություններով՝ այսօր անցակետ է ժամանել նաև Իգդիրի նահանգապետ Էրջան Թուրանը։ Տեղի պաշտոնյաները նրան ներկայացրել են կատարված աշխատանքները։