«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը
– «Ամբաղ-զամբաղ խոսելու համար երկու տարի տալը խիստ է։ Առաջարկում եմ ներմուծել Իրանից պատժամիջոց՝ ճիպոտահարել»,- Տիկնիկային թատրոնի ռեժիսոր Ռուբեն Բաբայանի՝ Հանրայինի եթերում հարցազրույցի ընթացքում հնչեցրած այս միտքը Միքայել Սրբազանի դատավճռի մասով բուռն քննարկման առիթ դարձավ: Դուք այս հայտարարությունը ինչպե՞ս կգնահատեք, կա՞ այստեղ բռնության կոչ:
– Չնայած նա արդեն հասցրել է նշել, թե իր այս հայտարարությունը ընդամենը հումոր է, բայց և նկատելի է, որ նա կալանքի այլընտրանքային մեթոդ է առաջարկում, ընդ որում՝ լսողի համար ծիծաղ առաջացնող, կոնկրետ իմ ծիծաղն առաջացրեց, որովհետև դա իրատեսական չէ ընդհանուր առմամբ: Ինձ համար լուրջ չէր նրա ասածը:
– Բռնության կոչ չե՞ք համարել այս հայտարարությունը:
– Իմ կարծիքով՝ դա ավելի շատ հումորի ժանրից էր, քան բռնության կոչ: Նշեցի արդեն, որ անլուրջ էր ինձ համար, հետևաբար դրան անդրադառնալու կարիք էլ չկար, որովհետև լուրջ խնդիր ես չեմ տեսել:
– Տիկի՛ն Ղազարյան, քննադատական խոսք հնչեց, որ երբ իշխանության հասցեին են նմանատիպ կոչեր հնչում, իշխանության ներկայացուցիչներն անդրադառնում են դրանց միանգամից, իրավապահներն են գործի անցնում, իսկ երբ իշխանության ընդդիմախոսների վերաբերյալ է հնչում նման խոսույթ, դրան ոչինչ չի հետևում:
– Ես նման օրինակ չեմ հիշում, կարո՞ղ եք օրինակներ բերել:
– Դե, մեկը Միքայել Սրբազանի խոսքը, Իմնեմնիմի փոդքասթի հաղորդավարների օրինակը, որոնք ձերբակալված են:
– Դրանք համեմատելու բաներ չեն ու բոլորովին այլ որակի խոսույթի ու վիճակի մասին են: Այն ատելության խոսքը, որ տարածվում էր այդ հաղորդումից, լրիվ ուրիշ մակարդակ էր, սա՝ բոլորովին այլ: Մենք մեր թիմի մասով բազմիցս ենք հայտարարել, որ մեզ համար բռնությունն անընդունելի է: Աջապահյանի դեպքում՝ նա անընդհատ կրկնել է այդ կոչը, իսկ դա արդեն այլ է, կոնկրետ Բաբայանի խոսքն ինձ վրա բռնության կոչի տպավորություն չի թողել:
– Իսկ համաձա՞յն եք պարոն Բաբայանի հետ, որ Սրբազանի պատիժը անհամաչափ է:
– Ոչ իհարկե, որովհետև Քրեական օրենսգիրքը հստակ սահմանում է, դատավորն էլ վճիռը կայացրել է: Չեմ կարծում, որ մենք պետք է գրաքննությամբ զբաղվենք հիմա:
– Ընդհանուր առմամբ Հայաստանում ոչ միայն քաղաքական գործիչների, այլև առհասարակ մարդկանց խոսքն ինչպե՞ս եք գնահատում՝ վիրավորանքի, բռնության կոչեր հնչեցնելու տեսանկյունից:
– Իհարկե կան խնդիրներ, ու ամեն մեկս մեր մասով պետք է ձգտենք մնալ քաղաքական խոսույթի սահմաններում, որքան էլ իրավիճակը լարված լինի: Մենք մեր մասով դա արդեն արել ենք՝ ընդունելով ներքին կանոնագիրք էթիկայի վերաբերյալ: Մենք մեր օրինակով փորձում ենք այլ քաղաքական ուժերի համար օրինակ ծառայել, որպեսզի նրանք էլ ստեղծեն իրենց համար զսպող մեխանիզմներ: Քաղաքական խոսույթը պատշաճ մակարդակի վրա չէ, բայց, իրականում, եթե համեմատենք 2021 թվականի հետ, ապա այն ժամանակ շատ ավելի սուր, կոպիտ ու տհաճ էր, քան հիմա, չգիտեմ, թե ինչ գործոններով պայմանավորված, ամեն դեպքում հիմա մեղմ է:
Քրիստինե Աղաբեկյան
MediaLab.am