15 դեկտեմբերի 2025 – 13:08 AMT
PanARMENIAN.Net – Շիրակի թեմի առաջնորդ Միքայել արքեպիսկոպոս Աջապահյանի տեղափոխումը քրեակատարողական հիմնարկից «Իզմիրլյան» բժշկական կենտրոն՝ անհրաժեշտ հետազոտություններ և հնարավոր վիրահատություն ստանալու նպատակով, հետաձգվել է վերաքննիչ բողոքի պատճառով։ Այդ մասին հայտնել է փաստաբան Մարինե Ֆարմանյանը, հայտնում է Aysor.am-ը։
«Վերաքննիչ քրեական դատարանում դեկտեմբերի 15–ին դատական նիստ կա, որի ընթացքում քննարկվելու է պաշտպանության կողմի ներկայացրած վերաքննիչ բողոքը՝ դատավճռի դեմ, արդարացման հիմքով։ Քննարկվելու է նաև դատախազության վերաքննիչ բողոքը, նրանք միջնորդել են, որ սրբազանի դեմ կիրառված պատժի սահմանաչափը բարձրացվի, պատիժը խստացվի»,-ասել է Ֆարմանյանը՝ ավելացնելով, որ սրբազանը բժշկական կենտրոն կտեղափոխվի դեկտեմբերի 16-ին։
Ավելի վաղ հայտնի դարձավ, որ Միքայել սրբազանի առողջական վիճակը վատթարացել է, և նրա պաշտպանները բարձրաձայնել էին վիրահատական միջամտության անհրաժեշտության մասին։ Նախատեսված էր, որ սրբազանը ԲԿ կտեղափոխվի դեկտեմբերի 15–ին։
Միքայել արքեպիսկոպոս Աջապահյանը դատապարտվել է 2 տարի ժամկետով ազատազրկման։Նրա նկատմամբ քրեական հետապնդում է հարուցվել ՀՀ Քրեական օրենսգրքի 422-րդ հոդվածի 2-րդ մասով՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի համար։ Նա կալանավորված է հունիսի 28-ից։
Միքայել արքեպիսկոպոս Աջապահյանը չի ընդունում իրեն առաջադրված մեղադրանքը։