Մարոնիներու Ռայի պատրիարքը երէկ Պքերքէի մէջ ընդունեց Լիբանանի մէջ Քաթարի դեսպան Սէուտ Պըն Ապտելռահման Ալ Թանին, որ իրեն շնորհակալութիւն յայտնեց Քաթարի ազգային տօնին նշման ներկայացուցիչ մը ուղարկելուն համար:
Դեսպանը դրուատեց մարոնիներու պատրիարքութեան «ազգային ռահվիրայական դերակատարութիւնը»:
Ան ընդգծեց, որ Քաթար կ՛աջակցի Լիբանանի մէջ մարդասիրական եւ կրթական նախաձեռնութիւններուն:
Պատրիարքը նաեւ ընդունեց Իրանի դեսպանատան մշակութային կցորդ Մոհամետ Ռիտա Քարտթաուին, որ «մեծապէս գնահատեց մարոնիներու պատրիարքութիւնն ու անոր մշակութային եւ հոգեւոր դերակատարութիւնը»:
Ան նշեց աւելի լաւ հասարակութիւններու կառուցման համար մշակութային եւ ակադեմական փորձառութիւններու փոխանակման կարեւորութիւնը եւ շեշտեց. «Մշակոյթը ժողովուրդները զիրար կը մօտեցնէ եւ երկխօսութեան տեւական կամուրջ մըն է»: