Միջազգային փաստաբան Ռոբերտ Ամստերդամը մի շարք միջազգային կազմակերպությունների զեկույց է ներկայացրել «Տաշիր» ընկերությունների խմբի նախագահ Սամվել Կարապետյանի նկատմամբ հետապնդումների վերաբերյալ։
«Հայաստանի ավտորիտար շրջադարձը. Նիկոլ Փաշինյանը և Սամվել Կարապետյանի ու Հայ Առաքելական Սուրբ Եկեղեցու նկատմամբ հետապնդումները» զեկույցն ուղղված է ՄԱԿ-ի Մարդու իրավունքների խորհրդին, Եվրոպայի խորհրդին, ԵՄ ինստիտուտներին և միջազգային կազմակերպություններին։
«Մեր թիմը պատրաստել է համապարփակ, ծանրակշիռ զեկույց, որը փաստագրում է Հայաստանում տեղի ունեցող մտահոգիչ զարգացումները։ Մեր նպատակը պարզ է՝ մերկացնել իշխանությունների ակնհայտ շեղումները օրենքի գերակայությունից և քաղաքական չեզոքությունից, որոնք լրջորեն վնասում են երկրի ժողովրդավարական հիմքերը»,- նշել է փաստաբանը։
Նրա խոսքով՝ զեկույցը մանրամասնորեն ցույց է տալիս, որ Կարապետյանի նկատմամբ հարուցված իրավական գործը կեղծ է և հստակ օրինակ է, թե ինչպես են քաղաքական դրդապատճառներով կոպտորեն անտեսվում իրավական նորմերն ու մարդու հիմնարար իրավունքները՝ ընդդիմախոսներին լռեցնելու համար։
Փաստաբանը կոչ է արել միջազգային հանրությանը անհապաղ և վճռականորեն գնահատել այս վտանգավոր իրավիճակը և պահանջել արդարադատության սկզբունքի վերականգնումը Հայաստանում։
Հունիսին Կարապետյանին կալանավորել էին եկեղեցու դեմ արշավը քննադատելուց հետո։ Դատարանն օգոստոսի 15-ից սկսած արդեն մի քանի անգամ երկարացրել էր բարերարի կալանքը։ Նոյեմբերի 13-ին ՔԿ-ն Կարապետյանի կալանքը 2 ամսով երկարաձգելու միջնորդություն էր ներկայացրել, որը բավարարվել էր:
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
