Հըզպալլայի ընդհանուր քարտուղար շէյխ Նայիմ Քասեմ երէկ պատկերասփռուած ուղերձի մը ընթացքին յայտնեց. «Իսրայէլի հետ գործակցիլը կը նշանակէ նաւին մէջ ծակ յառաջացնել, եւ այդ պարագային բոլորը պիտի խեղդուին»:
Անդրադառնալով «Մեքանիզմ»-ի յանձնախումբին մէջ քաղաքայինի մը նշանակման` Հըզպալլայի ընդհանուր քարտուղարը նշեց. «Պետութիւնը Իսրայէլին ձրի զիջում տրամադրեց, որ համազօր է 5 օգոստոսի սայթաքումի շարունակման»:
«Իսրայէլի ծառաներուն» կարեւորութիւն պիտի չընծայենք, եւ աշխարհի վրայ ոչ ոք կրնայ մեր պաշտպանական կարողութեան դէմ կանգնիլ», նշեց շէյխ Քասեմ:
«Իբրեւ լիբանանեան պետութիւն Իսրայէլի հետ մեր որեւէ յարաբերութեան մէջ նշաձողը համաձայնութեան սահմանն է», ըսաւ ան:
Շէյխ Քասեմ յայտնեց, որ բնական է, որ հայրենիքի մը մէջ քաղաքական տարակարծութիւն ըլլայ, եւ պէտք է զայն լուծել սահմանադրութեան, արժէքներու եւ փոխադարձ հասկացողութեան ճամբով` աւելցնելով, որ Հըզպալլան բոլորին հետ կը գործակցի պետութեան կառուցման եւ հողի ազատագրման համար:
Հըզպալլայի ընդհանուր քարտուղարը շեշտեց, որ կուսակցութիւնը ինքզինք եւ Լիբանանը պիտի պաշտպանէ` աւելցնելով, որ իրենք անձնատուր պիտի չըլլան:
«Յարձակումները զէնքին համար չեն, այլ աստիճանաբար Լիբանանը գրաւելու հիմքը դնելու համար», ըսաւ ան:
«Մենք պետութեան հետ կը գործակցինք, եւ Իսրայէլն ու Ամերիկան մեր ներքին հարցերուն լուծման հետ որեւէ կապ չունին», նշեց շէյխ Քասեմ` աւելցնելով. «Լիթանիի հարաւէն ետք» կոչուող բան գոյութիւն չունի»: