ՀՀ վարչապետի կնոջ՝ Աննա Հակոբյանի ղեկավարած «Իմ քայլը» հիմնադրամն արձագանքել է իր գործունեության մասին հրապարակմանը։
«Ժողովուրդ» թերթը դեկտեմբերի 5-ին գրել էր, որ հիմնադրամն ավելի շատ աչքի է ընկել նվիրատուների ցանկով, քան կատարած աշխատանքով։ Թերթի տվյալներով՝ 2025 թվականին հիմնադրամը 120 մլն դրամ է ստացել ութ անանուն աղբյուրներից և մի քանի ընկերություններից, որոնք հայտնվել են հանրային և դատական գործերում։
Հիմնադրամից նշել են, որ հոդվածը պարունակում է «մի շարք չհիմնավորված պնդումներ, փաստական սխալներ և մանիպուլյատիվ ձևակերպումներ, որոնք ստեղծում են իրականության հետ կապ չունեցող պատկեր հիմնադրամի մասին»։
Հիմնադրամը հերքել է որևէ կուսակցության օգտին աշխատելու մասին պնդումը։ Ըստ հաղորդագրության՝ հիմնադրամի հիմնադիրներից Հակոբյանը կուսակցական չի, չի զբաղեցրել կուսակցական պաշտոններ։ Նշվում է, որ Վահագն Թևոսյանը ևս կուսակցական գործունեությամբ չի զբաղվել։ Հիմնադիրներից Լենա Նազարյանն է «Քաղաքացիական պայմանագիր» կուսակցության անդամ, «սակայն նրա ներգրավվածությունը հիմնադրամում ոչ մի կապ չունի կուսակցական գործունեության հետ»։
«Հիմնադրամը չի ծառայել և չի ծառայում որևէ քաղաքական նպատակների, իսկ աշխատակիցները որևէ կուսակցության անդամ չեն։ Մեր աշխատանքը բացառապես ուղղված է կրթության, մշակույթի, երիտասարդության հզորացման, մարդկային ներուժի բացահայտման, սոցիալական ներառման և հանրային զարգացմանն ուղղված բարեգործական ծրագրերին, որոնց կյանքի կոչման համար երախտապարտ ենք մեր նվիրատուներին»,- ասվում է հաղորդագրության մեջ։
Անդրադառնալով «անանուն նվիրատուներին», հիմնադրամից նշել են, որ բարեգործական հիմնադրամների գործունեության տրամաբանությունը և միջազգայնորեն ընդունված պրակտիկան ենթադրում են, որ նվիրատուները իրավասու են մնալ անանուն և չհրապարակել իրենց ֆինանսական օգնությունը: Այնուհետև հիմնադրամը թվարկել է 2025 թվականին իրականացված մի շարք ծրագրեր, հայտնել, որ 1868 հայտատու դարձել է հիմնադրամի ընթացիկ ծրագրերի շահառու (+ 12000-ից ավելի «Կրթվելը նորաձև է» շարժման մասնակից):
Իր հայտարարության մեջ հիմնադրամը թվարկել է 10 ծրագիր, որոնք իրականացվել են 2025 թվականին, այդ թվում՝ կրթական ծրագրերի ֆինանսավորում, պատերազմի մասնակիցների մասնագիտական ներուժի զարգացման ծրագրեր, փոքր բիզնեսին աջակցություն, Լեռնային Ղարաբաղից բռնի տեղահանված անձանց աջակցություն և հատուկ կարիքներ ունեցող անձանց սոցիալական ներառմանն ուղղված ծրագրեր։
Հաղորդագրության մեջ ներկայացված տվյալների համաձայն՝ այս ծրագրերի ընդհանուր բյուջեն 2025 թվականին գերազանցել է 937 մլն դրամը։
