«ՀայաՔվե» ազգային-քաղաքացիական նախաձեռնության անդամ Հրայր Կամենդատյանը հայտարարեց, որ սոցիալական հարթակներում լայն քննարկում առաջացրած մի պետական պաշտոնյայի վերջին հրապարակումների տակ արձագանքները հիմնականում բացասական են եղել։
Կամենդատյանի խոսքով՝ պաշտոնյայի վերջին գրառման տակ 523 մեկնաբանություն է հավաքվել, որոնք ուսումնասիրելով՝ պարզ է դառնում հանրային հուզական և սոցիալական տրամադրությունը․
«523 մեկնաբանությունները կարդացել եմ։ Մոտ 98 տոկոսը հուսահատության, դժգոհության, ատելության և վիրավորական արտահայտությունների ժայթքում է։ Ես չեմ ուզում կրկնել այդ բառերը, բայց դրանք հստակ պատկերացում են տալիս մարդկանց վերաբերմունքի մասին»,– նշեց նա։
Կամենդատյանը բերեց մի քանի բնորոշ օրինակ՝ շեշտելով, որ դրանք ներկայացնում են իրական տրամադրությունները․
«Մարդիկ գրում են՝ «ողորմելի ստախոսներով բարբաջում եք», «Արցախը տվեցիք, 5000 անմեղ մարդիկ զոհվեցին», «ապագա չկա առանց Արցախի», «թոշակառուներին սովամահ եք անում», «սոված եկաք, շուտ դարձաք միլիոնատեր» և այլ կարծիքներ»,– ասաց նա։
Կամենդատյանը ընդգծեց, որ խնդիրը ոչ միայն քննադատության ծավալն է, այլ այն, որ պաշտոնյան «սոցիալական զգայունություն» չի ցուցաբերում․
«Այս անձնավորության համար մարդիկ կարծես պարզապես վիճակագրական ցուցանիշ են։ Նրա և հանրության միջև, Թումանյանի խոսքերով, մի անհուն ծով կա, որտեղ լողում են գթասրտության նավի բեկորները»,– ասաց նա։
Կամենդատյանը հավելեց, որ իրենց պայքարը չի կարող որակվել «հիբրիդային պատերազմ»․
«Եթե սա պատերազմ է, ապա արդարության պատերազմ է։ Մենք պայքարում ենք մոտ 502 հազար թոշակառուի և շուրջ 160 հազար նպաստառուի համար»։