Քաղաքացին ահազանգել է Oragir.News-ին՝ նշելով, որ Երևանի «Ծիրան» սուպերմարկետներից մեկից գնված «Grand Candy» ընկերության կոնֆետների ամբողջ փաթեթում հայտնաբերել է որդեր։ Վերջինս փոխանցել է տեսանյութ որտեղ երևում է, թե ինչպես են որդերն ակտիվորեն շարժվում կոնֆետների մեջ։
Քաղաքացին պատմել է, որ դեպքից հետո կապ է հաստատել «Grand Candy» ընկերության հետ, որտեղ, պատճառաբանել են, թե խնդիրը կապված է վաճառող կողմի՝ «Ծիրան» սուպերմարկետի հետ։ Սուպերմարկետի պատասխանատուները, իրենց հերթին, հայտնել են, որ խնդիրն առաջացել է արտադրողից։
Oragir.News-ը նույնպես կապ հաստատեց «Ծիրան» սուպերմարկետների ցանցի ներկայացուցիչների հետ, որոնք հայտարարեցին․ «Խնդիրը մեր կողմից չէ, այն արտադրողից է։ Դա ամանորյա խմբաքանակից է եղել, հետևաբար ժամկետի խնդիր չի կարող լինել։ Բացառված է, որ մեր պահման պայմաններից լինի»։
Մեր փորձը՝ պարզաբանում ստանալու «Grand Candy»-ից, ավարտվեց արտասովոր կարճ և անտարբեր պատասխանով. «Գրավոր հարցում ուղարկեք, 5 աշխատանքային օրում կպատասխանենք»։
Ընկերությունը չի շտապում կամ պատրաստակամ չէ օպերատիվ կերպով անդրադառնալ որակի վերահսկման հնարավոր խախտմանը՝ հատկապես որդերով ապրանքի վերաբերյալ բարձրացված աղմկոտ բողոքի պարագայում։
Հիշեցնենք, որ Երևանում և ՀՀ մարզերում գործող «Ծիրան» սուպերմարկետների ցանցը 2025 թվականի փետրվարից պատկանում է Արմեն Մարգարյանին։ Վերջինս հանդիսանում է 88 սուպերմարկետների ցանցի տնօրեն Նարեկ Նալբանդյանի քրոջ որդին և նույն խմբի հիմնադիրներից։